البطاقة الشخصية
الوسط : الفنان الكبير حمادة هلال فى البداية نحب نتعرف على بطاقتك الشخصية ؟
حمادة هلال : أنا محمد عبد الفتاح عبد العزيز
من مواليد الشرقية قرية اسمها السمطين .. مركز منيا القمح
ديه انا أتولدت فيها أنا أصلا قاهري واتربيت فى القاهرة لكن أنا وأخواتي أتولدنا هناك وعشنا هنا في القاهرة في حي الزاوية الحمرا في منطقة اسمها البوسيرين وكانت أيام الخير كله.
ووالدي موظف في شركة المقاولون العرب وهو له فضل كبير عليا جدا .
والدتي ست طيبة ولى أخ اسمه مدحت وأختين بنات اسمهم هند ونورا
ديه بطاقتي الشخصية
الوسط : وأنت تزوجت ولا لسه ؟
حمادة هلال : لا هو أنا خاطب بس وان شاء الله بنسعى في الجواز قريبا إن شاء الله.
الفن وثقافة الشعب
الوسط : هل الفن يعكس ثقافة البلد أو الشعب ؟
حمادة هلال : والله على حسب نوع الفن ممكن يعمل إحباط وممكن يعمل أمل يعنى سمعت شيء أو شوفت شيء ممكن يديني أمل وممكن يديني موعظة يعنى أنا بعتبر أن كل شيء أو أي حاجه ممكن تكون خير وممكن تكون شر
فادعوا لنا أن نقترب للخير.
الوسط : إنا اقصد هل هذا قاعدة ثابتة لكل أنواع الفنون ولا تختلف من فن إلي أخر؟
حمادة هلال : في حاجات بيقولوا عليها فن لكن هي مش فن طبعا مش هانقول هي إيه , لكن دا مش فن , الفن معروف , والإبداع معروف , والإبداع في الفكر معروف , يعنى أنت تفكر هاتعمل إيه وينفع الناس ويفيدهم , لكن في حاجات مش من الفن و بيقولوا عليها فن , وبيقبى فيها ضرر.
الوسط : ضررها أكبر من نفعها ...
حمادة هلال : وهى ممكن تكون نفعها مادي فقط لكن مش هاتنفع الناس وما فتكرش أن الناس هاتنتفع بيها ممكن حد ينتفع بيها إنه يفهم إن دي حاجه مش كويسة و مش مقتنع بيه.
يعنى ممكن مثلا تشوف حاجه زى دى ليها ضرر عليك لكن فجأة قلبك يصحى وتقول أنا ليه بعمل كده , أو ليه أنا هنا , أو أيه اللي أنا عامله في نفسي فممكن يفيدني من غير ما يقصد ولكن أنا اللي فدت نفسي .
الوسط : فعلا ... و زي ما تفضلت وشرحت ...ولكن ليه ظهرت هذه الأنواع من الفنون؟
حمادة هلال : أنا بعتبرها زي المثل اللي بيقول الكثرة تغلب الشجاعة , فعلا أنت لاقيت كثرة , فالصحفي مش لاقى مادة يكتبها , لكن بصراحة في صحفيين عندهم ضمير , وبيردوا على الصحفيين اللي بيكتبوا وخلاص ويقولوا هو ده اللي ماشى , وكده أنت بتلاقي ناس بتكتب وناس بترد عليهم وتقول له ده مش كويس , و ده مش صح , يعني مش هانقول كل الصحفيين ماعندهومش ضمير, لا , في ناس كويسة أكيد وكتير جدا كمان .
لكن هو فعلا اللي بيحصل بيخلي الجيل اللي طالع الهدف بتاعه بسيط , حتى الجيل اللي طالع هيكون فكره محدود , وفكره هيكون مغلق على نفسه , ولو فكر يخرج بره ممكن يعمل حاجه غلط , لأنه محدود جدا وخبرته بسيطة جدا .
الوسط : المشكلة إن الناس لا ترى تأثير الحياة الفنية على حياتهم الاجتماعية برغم من وجود تأثير قوي جدا, وعلى سبيل المثال الغناء , ولو اخترت كلمات جميلة وتتناول أمر هام ,أكيد هيكون لها أثر قوي جدا ؟
حمادة هلال : وأنا ماكدبش عليك ولازم نقول كده لكل الناس اللي بتقرأ وبتسمع لازم لما حد يعمل حاجه غلط يقول يا جماعة أنا غلطت في الحاجة دي عشان يبقى عرف الغلط.
يعنى أنا مثلا في أغنية عملتها لفيلم أنا ندمان جدا أنى عملتها , أغنية مسطول , برغم أنها نجحت جدا.
أنت عارف زى ما يكون اتزن على ودانى عشان اعمل الغنوة دي , وأنا في نفس الوقت قولت هاعملها و خلاص ، فيه وقت بيبقى الإنسان ضعيف فيه.
أنا كنت من الناس اللي ضعفت وفى نفس الوقت قولت هو ده اللي ماشى يلا ده فيلم محدش هايقول حاجه دا أنت مطرب فى شخصية في الفيلم.
لكن في الأخر الحاجات ديه بقت موجودة وهاتبقى موجوده والناس بتسمعها و الواحد لازم يغلط ولازم يحسب غلطه ففعلا الفن ممكن يبقى مؤثر جدا في الخير وممكن يبقى مؤثر جدا في الغلط .
هل للفن دور إيجابي في حياة المجتمع
الوسط : بالنسبة للأحداث إلي بتحصل حولينا في الوطن العربي كله وإحنا أمة واحدة ...شعورك أيه و أنت شايف الأحداث إلي بتحصل إمامك ؟
حمادة هلال : إحنا العرب مكسورين حتى في الجيل اللي طالع الولد بيبقى قاعد يتفرج على قناة الجزيرة مع والده وشايف اللي بيحصل وسامع الحوار والنقاش المستمر بين والده ووالدته فى البيحصل فى البلاد العربية والبيحصل فى الشعب العربى .
وبقى الكلام في البيوت كله إحباط والشباب تقول يا عم دا لو دخلوا هايعملوا فينا ويبهدلونا فبقى فيه خوف من الكلام كله بيقول أنا مش سياسي ، أن هافضل باصص تحت رجلي مش هابص أودام لأن مافيش أمل.
الوسط : هل ممكن تقدم حاجه فنية تفيد في ظل هذه الظروف ؟
حمادة هلال : أصل إيه اللي هايفيد بيه يعنى ؟ هايقولوا ما تغني لبلدك , هاغني أقول إيه ؟ أنا بكلم بصراحة , أه أنا بلدى على عنيه وعلى راسي لكن أنا عايز اتكلم عن أهلها , ولو هاغني لبلدى هاغني كتير لكن هايجوا الغلابة يقولولي أنت بتشفنا وإحنا واقفين على طبور العيش من 2 بليل لغاية الفجر.
فعملتلهم غنوه بتقول :
أحلامهم البسيطة أحلامهم الجميلة أحلام مش مستحيلة , لو تعبان يقفو جمبك وفى حضنك هايداووك , اللقمة بيقسموها وهمومهم بيداوها لو شايل هموم الدنيا من همك هايشلوك , الناس الطيبة اللي من القلب قريبة واخدين الدنيا ببساطة سايبنها لربنا عايشين على ادهم ومهما حصلهم بينسوا وجرحهم بيطيب من كلمة حنينة .
ممكن انا ما ذكرتش مصر, بس مصر طبعا تستحق بس أنا أكتر حاجه بحس بيها الناس .
الوسط : أنا أقصد حاجة زي الحلم العربي ؟
حمادة هلال : اتقال على فكرة , عملوا قبل كده اوبريت اللي هو الضمير العربى جميل طبعا .
الوسط : ولا انت بتقصد عموما كلام يمس مشاعر الناس زي الأغنية الي انت قلتها من شوية أغنية الناس الطيبة .....
حمادة هلال : أصل الناس ديه اكتر ناس لو حسوا انك حاسس بيهم هايقول طيب الحمد لله كويس دا إحنا فاكرين أننا تحت الأرض ومحدش حاسس بينا فلما تجيب مشهد مصوره ليهم ولحياتهم زى مثلا في البيت بيتك .
الوسط : ممكن كمان تفكر تختار كلمات على قضية العراقيين في مصر واظهر مشاعر الأخوة ومشاركتهم في أحوالهم مثلا؟
حمادة هلال : طبعا دي بتبقى فكره كويسه , لكن أهم حاجه هاتتعمل إزاى , وهاتبقى مؤثره ازاى , وقتها هايبقى إمتى , لأن لو الوقت مش مناسب هاتبقى ضدك مش في صالحك ، يعنى مثلا كان فيه قبل كده غنوه عملتها في 24 ساعة بس في الوقت ده كنت حاسس إن الناس كلها فرحانة حاسه بمصر وحاسه بالانتصار كان أيام الأمم الأفريقية فكانت الناس حاسه إنها انتصرت في الحرب , فكانت فرحه كبيرة جدا , فلحقت بسرعة وعملت أغنية " ولله وعملوها الرجالة ورفعوا راس مصر بلدنا " , أنا كنت باشوف ناس بتعيط وهى بتسمع الأغنية رغم إن الغنوة مش مؤثرة , لكن لازم كل حاجه تتعمل في وقتها .
مثلا أغنية اليتيم كانت معمولة في وقتها كان قبل يوم اليتيم بحاجه بسيطة
يعني على أساس إن يبقى في وقت مناسب لكن والله هي كل حاجه بتبقى جايه من عند ربنا وبيبقى فيه توفيق كده , سبحان الله.
يعنى مثلا أغنية محمد نبينا بقالي خمس سنين عايز اعملها والله لغاية ما الكوبلية اتكتب بلحن جميل، الجملة اللي بتقول ( من أول يوم في عمري سمعت ابوى وامى بيصلوا عليه حبيب الرحمن حسسنى بالأمان ) جمل كده كلامها جميل .
و في جملة كده سمعتها وأنا في المدينة وأخدتها من هناك من خمس سنين كانت أول مرة انزل المدينة الجملة بتاعت تسنيم , تسنيم ديه بنت صغيرة.
الوسط : ديه أغنية معروفة ؟
حمادة هلال : اه معروفة , بتقول محمد نبينا ، بنوره هادينا ،
واحتمال نعمل دويتوا أنا وهى , وهي لسه صغيره ما كبرتش اوي وقلتلهم والله لو فيه حاجه حلوة مفيش أي مانع ونتوكل على الله ، يعنى لو حاجه فيها تأثير كده يبقا كويس جدا .
حمادة هلال والإنشاد الديني
الوسط : مفكرتش تعمل غنوة دينية ؟
حمادة هلال : بص , أنا هاقول لحضرتك على حاجه يعنى أنا كان نفسي من زمان أعمل ده , يعنى أول حاجه من زمان طلعت بيها غنوة اسمها ( خلقتني ) يعنى أنا من زمان أوي بحب أقول الأغاني الدينية بس كنت بكش ..
الوسط : تكش ليه ؟
حمادة هلال : معرفش , لوحدي والله , الكلام ده من حوالي 6 سنوات ، في مرة كنت سمعت غنوه الكلام اثر فيا جدا فقلت يله نعملها ووافقت عليها, وفعلا الغنوة ديه أخذت صيط كبير جدا اللي اسمها (الإنسان ضعيف ).
وحتى تصويرها كان حلو جدا وأنا ما كنتش طالع فيها كان فيه ناس هيه اللي طالعه فيها رغم أنى ماكنتش راضي عن حاجات في التصوير لكن عامة كان كويس .
فأنا كان نفسي اعمل حاجه تانية يعني أنا بصراحة كان نفسي أعمل حاجه عن سيدنا محمد صلى الله عليه وسلم بس أنت عارف التأخير.
فلقيت سامي يوسف ما شاء الله نازل بغنوة جميلة ما شاء الله... فبردوا أداني دفعة قوية .
وكان سبب بصراحة ليا , وأنا بقولها ، فكنت قبل كده سمعت ( محمد نبينا ) وكنت ناوي أغنيها ما غنتهاش إلا بعد سامي يوسف ما ظهر وعملتها بشكل مصري شكل بتاع الناس علشان يوصل للناس البسيطة والحمد لله هي نجحت والكل شارك بقدر المستطاع فيها وحتى اللي صوروا الأغنية ما خدوش مننا فلوس كتير فالحمد الله وجزآهم الله خيرا.
الوسط : في الأغاني الدينية أكيد اختيار الكلمات و الألحان له تأثير كبير على الناس؟
حمادة هلال : لو غنوة تقيلة ومعنيها تقيلة مينفعش تتعرض مره وحده ولكن بالبساطه اعتقد كده هتكون أفضل .
يعني مثلا أنا في أغنية بعملها عن الأم يا رب تتعمل , بتمنى أنها تتعمل بطريقة كويسة ،
الوسط : هل أنتاج الأغاني إلي زي دي في إقبال عليها في الإنتاج ؟
حمادة هلال : أكيد, الناس إلي أنتجوا محمد نبيا بيسئلوني رمضان اللي جاي هانعمل إيه؟
فيارب يارب يثبتهم , أحنا محتاجين ما يبقاش كل واحد لوحده , إحنا محتاجين للي هاينتج واللي هايقدم لان هى ده عناصر النجاح.
أنا مثلا محتاج للى يصور ويصور كويس يعنى مثلا زمان كان فيه ناس يقولوا الغنوة الدينية مش محتاجه تصوير أوي لأنها بسيطة لكن دلوقتي لاء .
الوسط : أنت شفت تصوير أغنية مشارى راشد ؟
حمادة هلال : اه... يعنى تخيل مثلا لو مشاري راشد طالع لوحده في طلع البدر علينا هو كان صور واحدة قبل كده في بيته كانت ابسط بس الناس ما نجذبتش الا في النشيد اللي أتصرف عليه في التصوير جامد حتى الأطفال الصغيرة كانوا بيتفرجوا عليه وانجذبوا للتصوير في الأول بعد كده بدأوا يركزوا في الكلام وفي الصوت وفي الشخص لأن مشاري طالع ما شاء الله طالع بالسنة بالشكل الجميل , في ناس بصراحة أنا بحسها التأثير بيبقى عالي جدا , هو يعني مثلا سامي يوسف لما طلع أول مرة إحنا اللي شدنا ايه ؟
واحد بيتكلم انجليزي وبيقول اسم سيدنا محمد صلى الله عليه وسلم فلما لاقيناه عمال يتكلم انجليزي كتير وراح قايل يا حبيبى يا محمد خلانا نحب نسمعة وطالع بصوره حلوه والحاجات ديه بتطلع رد فعل حلو وبجيب نتيجه كويسه انك تعمل اوديو حلو يعنى ما تعملش صورة مبهرة وصوت وحش ,
يعنى من أسباب نجاح محمد نبينا إن كان كل الناس عايزها تنجح فربنا كرمنا كل الناس قالت عايزين نعملها كويس المخرج ماخدش فلوس ومدير التصوير ما خدش فلوس وبالرغم من كده أتكلفت جامد أتكلفت مبلغ كبير مش صغير,
ولو لحن حلو وصوت حلو متصور كويس خلاص قدمة في الإذاعات عشان ما تقللش من قيمته , ولو هاتصرف فاصرف جامد لانك بترفع من قيمته ومن نجاحه لان ديه حاجه مهمة أوى .
فى نهاية الحوار نشكر الفنان حمادة هلال على اتاحة الفرصة لنا بالقيام معه بهذا الحوار.
الرئيسية 
البوابة 
أحدث الصور 
الجمعة يوليو 18, 2008 10:30 am من طرف rosse
موضوع: البطاقة الشخصية للفنان حمادة هلال 
